కొత్తపాళీ “రంగుటద్దాల కిటికీ” సమీక్ష

రాసిన వారు : సుజాత (మనసులో మాట)

నా స్వపరిచయం ప్రత్యేకంగా ఏమీ లేదు. జర్నలిజం చదువుకుని కొద్ది రోజుల పాటు పని చేసాను. రంగనాయకమ్మ, కొడవటిగంటి కుటుంబరావు,నామిని గారి రచనలంటే బాగా ఇష్టపడతాను. జీవితాన్ని నిజాయితీగా ఆవిష్కరించే ఏ రచనైనా నా అభిమాన రచనే! ఇంకా చదవని, వెదుకుతున్న పుస్తకం క్రిస్టఫర్ రీవ్(హాలీవుడ్ సూపర్ మాన్) రాసిన still me! ఏ పనైనా చేస్తూ సరే పుస్తకాలు చదవగలను. వంట చేసేటపుడు కూడా పుస్తకం చేతిలో ఉండాల్సిందే! రాయడం అంటే బద్ధకం, చదవడం అంటే ఎక్కడ లేని ఉత్సాహం!

*************************************
వర్షం కురిసి వెలిసిన ఓ చల్లని సాయంత్రం అలా నడక సాగిస్తున్నపుడో, కిటికీ లోంచి పచ్చని ప్రకృతిని ఆహ్లాదకరంగా వీక్షిస్తున్నపుడో మంచి కథో నవలో గుర్తొస్తే అది రంగుటద్దాల కిటికీ అయి ఉంటే ఆశ్చర్యపడక్కర్లేదనిపించింది ఈ కథా సంకలనం చదివాక!

ఎన్నారైల జీవన చిత్రాన్ని (ముఖ్యంగా అమెరికా జీవితాల్ని) ఆవిష్కరించే సాహిత్యాన్ని మొదటగా విస్తృతంగా పరిచయం చేసింది మందపాటి సత్యం,వంగూరి చిట్టెన్ రాజు గార్లైతే ఆ తర్వాత చాలా మంది ఎన్నారై రచయితలు ఈ ప్రయత్నాన్ని కొనసాగించి వారి వారి కోణాల్లో చేసిన కృషి అభినందనీయం! కొత్తపాళీ గా తెలుగు బ్లాగ్లోకానికి సుపరిచితులైన శ్రీ ఎస్. నారాయణ స్వామి గారు రచించిన “రంగుటద్దాల కిటికీ” కథా సంకలనం ఇటీవల విడుదలైంది. హైదరాబాద్ బుక్ ఫేర్ లో తెలుగు బ్లాగర్లనే కాక ఇతర సాహితీ ప్రియులను కూడా ఆకట్టుకుంది. మొత్తం 21 కథలున్న ఈ సంకలనంలో “రంగుటద్దాల కిటికీ” కథ ఎక్కడుందని చూశాను గానీ అది కేవలం సంకలనం పేరు మాత్రమే!రచయిత కనీసం ఒక ముందు మాట రాసి ఈ పేరు వెనుక ఉన్న ప్రేరణ ఏమిటో వివరిస్తే బాగుండేది.

గొప్ప గొప్ప సంఘర్షణలు, మనసుని ఉద్వేగ పరిచే చిత్రణలు, అంతర్జాతీయ చర్చాంశాలు,వాదాలు ఇవేవీ లేకుండా హాయిగా చల్లగా సాగిపోయే కథలు ఇవన్నీ! అలాగని మరీ సరదా టోన్ తో రాసినవి కావు. కొన్ని కథలు నిజంగా ఆలోచనలని రేకెత్తిస్తాయి కానీ మనసు పాడు చేసుకునేంత సీరియస్ గా మాత్రం కాదు.ఎక్కువగా ఈ మాట అంతర్జాల పత్రికలో ప్రచురిమైన ఈ కథలు ఇప్పటికే బ్లాగర్లు కొందరు చదివినా నాలాగా మొదటిసారి చదివిన వారికి తప్పక చదవాల్సిందే అనిపించేలా ఉంది ఈ సంకలనం!

మనసులోని భావాలు పంచుకునే తోడు లేక, తనవారనుకున్న వారు ధనానికే తప్ప మనసుకు విలువనివ్వనివారని తెలుసుకున్న ఓ తండ్రి సరస్సు దగ్గర పరిచయమైన ఒక బాతు తో స్నేహం కలపడం, అది వలస పోతే ఎలాగని బెంగపడటం “వీరిగాడి వలస” కథ ఇతివృత్తం! తనని అనుమానించిన కోడలికీ, ఆమెకు వంతపాడిన కొడుక్కీ ఘాటుగా సమాధానం చెప్పిన రాఘవరావు లాంటివాళ్ళు ఇంకా బోల్డు మంది తయారు కావాల్సి ఉందనిపిస్తుంది.

సాహసం శాయరా డింభకా కథ చాలా మంది ఒకసారి తమ జీవితంలోకి తొంగిచూసుకునేలా చేస్తుంది. ఇలాంటి అనుభవాలు ఎన్నారైలకే కాదు, ఎవరికైనా సరే ఎదురయ్యే ఉంటాయి. సాయం పొందాక కన్వీనియెంట్ గా మర్చిపోయేవారికి కొదవా ఈ లోకంలో? అదే సమయంలో మనం ఎదురు చూడని వారే మనకి సాయం చేసే సంఘటనలు కూడా అరుదేం కాదు!

“వర్జినిటీ”ని మాత్రమే “ఇండియన్ వాల్యూ” గా గుర్తించే విద్యాధికుడైన నవతరం యువకుడు కృష్ణకు కథా నాయిక వాసంతి ఇచ్చిన షాకు బహుబాగు!తన సంగతెలా ఉన్నా,తను చేసుకోబోయే పిల్ల మాత్రం కన్య అయి ఉండాలని,అదే ఇండియన్ వాల్యూ అని నమ్మేవాళ్ళు ఏ దేశమేగినా,ఎందుకాలిడినా ఒకటే! ” ఇండియన్ వాల్యూస్ ” కథ చాలా సేపు ఆలోచించేలా చేస్తుంది.

విమర్శకుల ప్రశంసలు విరివిగా పొందిన “తుపాకీ” కథ గురించి ప్రత్యేకంగా చెప్పనక్కర్లేదు. చూసిన దాన్ని ప్రతిబింబించే అద్దంలాంటి పసిహృదయాన్ని సమర్థవంతంగా చిత్రించిన ఈ కథలో “నాన్నా, నాకు తుపాకీ వద్దు“అన్న చిట్టచివరి డైలాగ్ చక్కని ముక్తాయింపు!

అమెరికా జీవితాల్లోని ఒక డొల్లతనపు కోణాన్ని నగ్నంగా ఆవిష్కరించే మరో కథ “చక్కని చుక్క“! ఇందులో రాశి మనస్తత్వాన్ని చిన్న తనం నుంచీ పెద్దయ్యేదాకా సుచరిత కళ్ళతో రచయిత వర్ణించిన తీరు అద్భుతంగా తోస్తుంది.రచయిత నిశిత పరిశీలనని మనకి అవగతం చేస్తుంది.

ఏ కథలోనూ ప్రధానమైన అంశం కాకపోయినా,పూలదండలో చెమికీలా దాదాపు ప్రతి కథలోనూ తళుక్కున మెరిసే సున్నితమైన హాస్యం కథలకు వన్నెలద్దింది. ఓ తల్లి గొడవ కథలో అమెరికన్ అల్లుడు తెలుగు పెళ్ళికి ఒప్పుకున్నా, వేద వేదమంత్రాలు వల్లిస్తున్నా ఆ తల్లి సంతోషించక,”హబ్బో, ఈ తెల్ల పెళ్ళికొడుకు శాస్త్రులు గారి వెనకాలే మంత్రాలు చిలకపలుకులు బాగానే వల్లిస్తున్నాడే”అని వెటకరిస్తుంది. సున్నితమైన హాస్యాన్ని పండిస్తూనే మరో పక్క తల్లి మనసుని ఆవిష్కరించే సఫల ప్రయత్నం!

“రాయల్ వియ్”పర్సన్ లో సాగే స్వగతం “ఓరి భగవంతుడా ఇప్పుడేం దారి?” కథ లో పక్కింటమ్మాయినీ,పన్లో పనిగా పనిమనిషినీ కూడా ట్రై చేసి భంగపడిన యువకరత్నం పూయించే నవ్వులు చాలానే!

ఆదా, నీవేనా నను తలచినది, అత్తగారితో కొత్త కాపురం ఇవి కొన్ని సరదా కథలు. కొన్ని కధలు చక్కని స్కెచ్ ల లాగా కూడా అనిపిస్తాయి. పూర్వజన్మ వాసన,ఎఫీషియెన్సీ ప్లీజ్, ఒక జనవరి శనివారం…. ఇవన్నీ అలాంటివే! వీటిలోనూ ప్రత్యేకంగా నిలిచేది ఒక జనవరి శనివారం..! “కళాకారుడికి కావలసింది”,”వలయం”,”డిటెక్టివ్ నీలూ” సాదా సీదాగా ఉన్నాయి.

ఎన్నారై సాహిత్యమనగానే అక్కడి వాతావరణాన్నో,రోడ్లనో, మాల్స్ నో,లేక జీవన విధానాన్నో కళ్ళకు కట్టినట్టు చూపించాలని రచయితలు పడే తాపత్రయం, నారాయణ స్వామి గారు పడకపోవడం ఈ కథల్లో ముఖ్యంగా ప్రస్ఫుటంగా కనిపిస్తుంది. కథల్లో జీవితం, అందులోని పాత్రలతో పాటు విదేశీ వాతావరణం కథకు అనుసంధానంగా అంతర్లీనంగా కనిపిస్తుందే తప్ప అదే ప్రముఖ పాత్ర వహించదు. (ఈ కథలన్నీ జాలపత్రికల్లో ప్రచురితం కావడం వల్లా, టార్గెట్ రీడర్స్ ఎక్కువగా ఎన్నారైలే కావడం వల్లా రచయిత ఇలా రాసి ఉండవచ్చు కూడా!)

అక్కడక్కడ కథల్లో ఆంగ్ల సంభాషణలు ఎక్కువగా చోటు చేసుకోవడం కొద్దిగా ఇబ్బంది కల్గిస్తుంది.(తెలుగులో ఆంగ్ల సంభాషణలు చదవడమంత తలనొప్పి ఇంకోటి ఉండదు!)అన్వర్ గీసిన ముఖచిత్రం అద్భుతంగా అమరింది.

నవోదయ పబ్లిషర్స్ ప్రచురించిన ఈ పుస్తకం ధర 75 రూపాయలు(లేదా 9 డాలర్లు)అన్ని ప్రముఖ పుస్తకాల షాపుల్లోనూ లభ్యం!