Select book shop లో కాసేపు

నిన్న నేను అనుకోకుండా బెంగళూరులోని ‘సెలెక్ట్ బుక్ షాప్’ కి వెళ్ళాను. పప్పు నాగరాజు గారు నన్ను అక్కడికి తీసుకెళుతూ, “this is like a temple of books, in bangalore” అన్నారు, అక్కడ Bangalore theatre jam గ్రూపు ఒకటి సెలెక్ట్ యజమాని మూర్తి గారిని ఇంటర్వ్యూ చేస్తూ ఉండింది. పరిచయాలు ఔతున్నంత సేపు – ఈ మూర్తి గారిని ఎక్కడ చూశానబ్బా? అని ఆలోచిస్తూ ఉన్నాను. చివర్లో ఆయన, “నేను బెంగలూరు మిర్రర్ అన్న లోకల్ టాబ్లాయిడ్ కి అప్పుడప్పుడూ రాస్తూ ఉంటాను” అన్నారు. “ఆహా…నేను చదివేదాన్ని దాన్ని రోజూ, నెలక్రితం వరకూ….” అంటూ ఆలోచనలలో పడ్డాను – ఈయన్నెక్కడ చూశానబ్బా అని. తర్వాత టాపిక్ మారింది. ఓ రెండు నిముషాల తరువాత – “మీ ఫొటో ఉంటుంది కదూ, ఆ బెంగలూరు మిర్రర్ కాలం లో?” అడిగాను. అరిచానేమో. ఆయన కొంచెం ఆశ్చర్యపడ్డట్లు ఉన్నారు – “అవును” అన్నారు. “అదీ! ఆ కాలం నేను చదివాను. అక్కడ ఫొటో చూశాను…” – హమ్మయ్య! ఆత్మారాముడి క్యూరియాసిటీ కి తృప్తి కలిగింది.

‘సెలెక్ట్’ నలభైల నుంచీ ఉందట బెంగలూరులో. మూర్తిగారు వాళ్ళ నాన్న గారికి పుస్తకాల ప్రేమ గురించి చెప్పుకొచ్చారు. అక్కడ్నుంచి, తను ఇందులోకి ఎలా వచ్చిందీ చెప్పారు. ఇంకా అక్కడ ఇంటర్వ్యూ జరుగుతూ ఉండింది కానీ, సమయాభావంవల్ల మేము బయటకి కదిలాము.

మూర్తిగారి సంగతి కాసేపు పక్కన పెడతా. ఆయన చెప్పిన కథలు వింటూ ఉంటే, వాళ్ళ నాన్న నాకు చాలా ఆసక్తికరమైన వ్యక్తి అనిపిస్తున్నారు. ఆయనకు పుస్తకాలపై ఉన్న ప్రేమ చూస్తే, ఆశ్చర్యం కలుగుతోంది. ఆయన మొదట చెన్నై లో చదువుకునేరోజుల్లో రాజాజీ (చక్రవర్తి రాజగోపాలాచారి) ఈయన వ్యక్తిగత లైబ్రరీ నుండి పుస్తకాలు తెప్పించుకునేవారట. తరువాత మజిస్ట్రేటుగా కర్నూలు చేరారు. అక్కడ తగిలింది నాకు తొలి షాకు – ఈయన కర్నూల్ నుండి బెంగళూరు వెళ్ళి – అక్కడ బ్రిటీషు వారు ఎవరన్నా దేశం వదిలేస్తున్నప్పుడు సామాన్లతో పాటు పుస్తకాల కలెక్షన్ కూడా వేలం వేస్తూ ఉంటే, కొనుక్కుని, మొత్తాన్ని కర్నూలు కు తెచ్చేవారట!! కొన్నాల్టికి, వ్యక్తిగత కారణాల వల్ల బెంగలూరు కు వచ్చేశాక, పుస్తకాల దుకాణం తెరిచారట.

రెండో షాకు : నేను మూర్తిగారు కూడా మొదట్నుంచీ ఈ వ్యాపారంలో ఉన్నారు అనుకుంటున్నా అప్పటిదాకా. ఆయన ఏరోనాటికల్ ఇంజినీరనీ, Institute of science (బహుశా IISc ని అలా అన్నారనుకుంటాను) లో పీజీ చేసాననీ, తరువాత HAL లో దాదాపు ఇరవైయేళ్ళు పని చేసి, యూరోప్ లో కూడా కొన్నాళ్ళున్నానని చెప్పాక ఆశ్చర్యపోయాను. అంతేకాదు, అక్కడ్నుంచి వెనక్కొచ్చాను, అంటూ ఉంటే, అప్పుడొచ్చారేమో ఈ వ్యాపారంలోకి అనుకున్నా. కాదట. మళ్ళీ నాలుగైదేళ్ళు అమెరికాలో పని చేశారట. ఆ తరువాత – ఇక్కడికి.. ప్రస్తుతం సెలెక్ట్ బుక్ షాపు బాధ్యతలను ఈయన కొడుకు సంజయ్ కూడా పంచుకుంటున్నారు.

ఇలా వివిధ ప్రాంతాల్లో ఉన్నప్పుడు పుస్తకాలు కొనడం, ఆ టన్నుల కొద్దీ పుస్తకాలు ఇంటికి నాన్నగారికి పంపడం – చేసేవారట. అలా ఫ్రాన్సులోని ఓ సెకండ్ హాండ్ పుస్తకాల షాపులో – జయచామ రాజేంద్ర వడయార్ ముఖచిత్రం ఉన్న పుస్తకాన్ని కనిపెట్టి, దాన్ని తన తండ్రికి పంపడం గురించి చెప్పిన కథ చాలా ఆసక్తికరంగా ఉండింది. సీ.వీ.రామన్ తో తన తండ్రికున్న అనుబంధం, చివరి రోజుల్లో కూడా వాళ్ళ నాన్న గారు తిరుచ్చి లోని పుస్తకాల కొట్ల వీథికి వెళ్ళాలని పట్టుబట్టి వెళ్ళి కొన్ని అపురూపమైన పుస్తకాలను అక్కద వెలికితీయడం, ఇలాంట్వన్నీ వింటూ ఉంటే, అయన్ని కలిసి ఉండాల్సింది కదా అసలు, అనిపించింది (ఈయనే చాలా పెద్దాయన. 70 పైనే ఉంటాయి. ఇక వీళ్ళ నాన్నని నేను కలిసి ఉండాలంటే – నేనెప్పుడు పుట్టి ఉండాల్సిందో!!)

ఇంతకీ, ఈ అనుభవంలో బెంగలూరు లో పుస్తకాల కొట్ల చరిత్ర గురించి కొంత తెలిసింది. 40లలో ఇక్కడ పుస్తకాల కొట్ల గురించి ఆయన అలవోకగా ఫలనా వీథిలో ఫలానా మనిషి, ఫలానా మార్కెట్ వెనుక ఏదో సంఘం – ఇలా చెప్పేస్తూ పోతూ ఉంటే, అబ్బురంగా చూస్తూ అలా ఉన్నా వీలైనంత సేపు 🙂

చెప్పడానికైతే చాలా ఉంది కానీ, మరోసారి ఆయన్ని కలిసి, అవి కూడా కలుపుకుని మరిన్ని విశేషాలు చెబుతా 🙂

____________________________________________________________________________________

Address:

No. 71, Brigade Road, Cross, Brigade Road
Bengaluru,  Karnataka 560001
080 25580770