రాసిన వారు: Halley
************
ఈ పుస్తకం తెరవగానే ముందుగా నన్ను కట్టి పడేసింది రచయిత డి.డి.బసు గారి బయో-డాటా . అది ఉన్నది ఉన్నట్టుగా ఇక్కడ టైపు చేస్తున్నాను .
“ఆచార్య Dr.దుర్గా దాస్ బసు : (M.A , LL.D. ; D.Litt ; సరస్వతి , వాచస్పతి , విద్యావారిధి , ఫ్రజ్నభారతి , న్యాయరత్నాకర , నీతి భాస్కర , న్యాయభారతి , మానవరత్న , ఆనరరీ ప్రొఫెసర్ BHU , రిటైర్ద్ జడ్జి , హైకోర్టు కలకత్తా , ఫార్మర్ మెంబర్ యూనియన్ లా కమిషన్ , ఠాగూర్ ప్రొఫెసర్ , అశుతోష్ మెమోరియల్ , లెక్చరర్ కలకత్తా యూనివర్సిటి , పద్మభూషణ్ నేషనల్ రిసెర్చ్ ప్రొఫెసర్ ఆఫ్ ఇండియా , నేషనల్ సిటిజెన్స్ అవార్డ్ , ఆనరరీ ఫెల్లో ఏషియాటిక్ సొసైటీ కలకత్తా)”

ఇన్ని చదువులు , బిరుదులు కలిగిన వ్యక్తి రాసిన పుస్తకం అనగానే ఒక గౌరవం ఏర్పడిపొయింది తెలియకుండానే . పుస్తకం చాలా వరకు లా విద్యార్థులు , బి.ఎ , ఎం.ఏ , UPSC వగైరా ఎగ్జామ్స్ లకు చదివే వారికి చాలా ఉపయోగపడుతుంది . వీరు కాక పుస్తకం చివర రాసినట్టు “Politicians , Journalists , Statesmen , Administrative authorities” కి కూడా చాలా ఉపయోగపడే పుస్తకం . చిన్నపటి సోషల్ స్టడీస్ పుస్తకాలు నాకు అన్యాయం చేసాయి అని భావించే వాళ్ళు ఎవరన్నా ఉంటే కూడా ఈ పుస్తకాన్ని చదవచ్చు. ఇంచు మించు ఒక పాఠ్యపుస్తకం లాగా చదవాల్సిందే ఈ పుసకాన్ని .

మనలో చాలా మందికి రాజ్యాంగం గురించి చాలా తక్కువ తెల్సు . ఏదో చిన్నప్పుడు చదువుకున్న ఫండమెంటల్ రైట్స్ , డ్యూటీస్ వగైరా తప్ప అంత కంటే ఎక్కువ .. రాజ్యంగం గురించి చదివే అవకాశం మరియు అవసరం రెండూ రావు మనకి . స్టేట్ సిలబస్ పుస్తకాలలో ఐతే సాంఘిక శాస్త్రానికి ఎపుడూ అన్యాయమే ! అందునా సివిక్సు అంటే మరీ అత్తెసరుగా ఉండేవి మా పాఠాలు . నేను ఈ పుస్తకం అద్యంతం చదవటానికి అది కూడా ఒక కారణం .

అసలు బొత్తిగా ‘లా’ పుస్తకాలతో పరిచయం లేని నాలాంటి వాడికి ఈ పుస్తకంలో రచయిత పేర్కొన్న రకరకాల కేసులు వాటి వలన రాజ్యాంగంలో జరిగిన మార్పులు చదువుతూ ఉంటే .. ఔరా అని అనిపించింది. ఉదా : గోలక్నాథ్ vs స్టేట్ ఆఫ్ పంజాబ్ , కేశవానంద vs స్టేట్ ఆఫ్ కేరళ , మనేకా గాంధి vs యూనియన్ ఆఫ్ ఇండియా , మినర్వా మిల్స్ vs యూనియన్ ఆఫ్ ఇండియా . ఇది కాక ఇందిర గాంధీ ప్రభుత్వ కాలంలో ఎమర్జెన్సీ పీరియడ్ కేసులు, జనతా పార్టీ కాలంలో జరిగిన మార్పులు వాటి వలన జరిగిన పరిణామాలు ఇవన్నీ సవివరంగా రాసారు . ఎప్పుడూ భా.జ.పా వారి ఎన్నికల ప్రచారంలో చూచినదే కానీ కాశ్మీర్ రాష్త్ర్రానికి మాత్రమే ప్రత్యేక రాజ్యాంగం ఎందుకు ఉండవలసి వచ్చింది వగరా గురించి నేను పెద్దగా చదివింది లేదు . ఈ పుస్తకంలో కాశ్మీర్ గురించి ఒక ప్రత్యేక అధ్యాయం ఉంది , అందులో ఆ రాష్ట్ర రాజ్యాంగానికి మన దేశ రాజ్యాంగానికి గల తేడాలు వగైరా చాలా చక్కగా వివరించారు . ఇవన్నీ ఒక ఎత్తు ఆయితే చివరన “మన రాజ్యాంగం ఎలా పని చేసింది” (“how the constitution has worked”) అన్న అధ్యాయం ఇంకొక ఎత్తు.ఇందులో సెపరేటిస్టు ఫోర్సెస్ , అస్సామ్-బంగ్లాదేశ్ , కమ్యునలిజం , భాషా ప్రయుక్త రాష్త్రాలు వగైరా విషయాలు రాజ్యాంగాన్ని ఎలా ప్రభావితం చేశాయి అన్నది కూడా చక్కగా వివరించారు . ఇవన్ని కాక రాజ్యాంగంలో ఇంచు మించు అంగుళం అంగుళం గురించి చర్చించారు ( ఇంతా చేసి ఇది కేవలం “Introduction” మాత్రమే ) . ప్రతీ అధ్యాయం చివరన ఉన్న రెఫరెన్సెస్ విభాగం కుడా ఎన్నో కొత్త విషయాలని తెలుసుకోటానికి ఉపయోగపడుతుంది (ఇందులో చాలా వాటికి వికిపీడియా వాడుకోవలసి వచ్చింది) .

ఒక చక్కని రెఫెరెన్సు పుస్తకంగా దీనిని వాడుకోవచ్చు. అయితే ఒక్కసారి చదివేసి పక్కన పారేసే పుస్తకం కానే కాదు మరి !

వెల : 175/- పేజీలు : 506