టీచరు: కథ – కమామిషు

వ్రాసిన వారు: దేవినేని మధుసూధనరావు గారు
********
శ్రీ కత్తి నరసింహారెడ్డి సంపాదకత్వంలో వెలువడిన “టీచరు: కథ – కమామిషు” అనే పుస్తకం రెండు కాపీలు నా స్నేహితులు శ్రీ సాకం నాగరాజ మరియు శ్రీ కోట పురుషోత్తం నాకు అందచేసారు.

పుస్తకాలు వచ్చిన వెంటనే చదవటం ప్రారంభించాను. ఆశ్చర్యం, సంతోషం. ఒక్క బిగిన చాలా కథలు, వ్యాసాలు చదివాను. ఇంత మంచి పుస్తకం, అందునా ఉపాధ్యాయులను ఉత్తేజపరిచే పుస్తకం ప్రచురించిన శ్రీ కత్తి నరసింహారెడ్డి గారికి ఉపాధ్యాయలోకం ఋణపడివుంటుంది. ఈ మాటే ఆయనకు ఫోన్ చేసి చెప్పి, ఓ వంద కాపీలు వెంటనే పంపించమని కోరాను. ఆసక్తివున్న మిత్రులందరికీ ఈ పుస్తకాన్ని పంచాలని నా కోరిక.

ఇది ప్రతి టీచరూ చదవాల్సిన పుస్తకం. ఇందులోని కథలూ, వ్యాసాలు వారిని ప్రభావితం చేస్తాయనడంలో సందేహం లేదు. సామాజిక స్పృహవున్న ప్రతివారు చదవాల్సిన పుస్తకమిది. ఈ పుస్తకంలో కొన్ని తీసివేసి, మరికొన్ని మంచి వాటిని జతపరిచి, ధర కూడా ప్రతి టీచరూ కొనగలిగినవిధంగా తగ్గించి రెండవ ఎడిషన్ విడుదలచేస్తే బాగుంటుంది.

ఫుస్తకం చదువుతున్నపుడే కథలకీ, వ్యాసాలకీ స్టార్ రేటింగ్ ఇచ్చేసుకున్నా. కొన్ని కథలు, వ్యాసాల గురించి నా అభిప్రాయం. బాపుగారంటే బొమ్మలే గీస్తారు కాని వారు రాస్తారా అని చాలమంది అనుకుంటారు. వారు మంచి రచయిత కూడా అని వారి “గాడ్ ఫాదర్ గురించి కాస్త” వ్యాసం చదివితే అవగతం అవుతుంది. ఈ వ్యాసం చాలా చక్కగావుంది. దీన్ని నేనిదివరకే చదివాను. కానీ దానిని యిప్పుడు ఈ పుస్తకంలో బాగా ఎంజాయ్ చేశా. మనసారా నవ్వుకున్నాను. డా. వెల్చేరు నారాయణరావు గారి వ్యాసం “సామాజిక…” టీచర్లందరినీ ఆలోచింపచేసేదిగా వుంది. పిల్లల మనస్తత్వాన్ని చక్కగా విశదీకరించారు. అలాగే గెద్దాడ కస్తూరి గారి “మాస్టారి కో శిక్ష” లో కూడా పిల్లల మనస్తత్వాన్ని చక్కగా తెలియచేశారు. పిల్లలను శిక్షించినవారు చివరకు ఏవిధంగా తయారవుతారో తెలియచేసే కథ ఇది. అబ్దుల్ కలాం గారి ఆత్మకథనుండి ఎంచుకున్న వ్యాసం ముఖ్యంగా ఇంజినీరింగ్ కళాశాల టీచర్లకు కనువిప్పు కల్గిస్తుంది. సింగమనేని నారాయణ గారి కథ “తరగతిలో తల్లి” అద్భుతం. పిల్లలను ఏవిధంగా ఆకట్టుకోవాలో తెలియచేసే కథ. ప్రతి టీచరూ, ఎప్పుడూ గుర్తుండేలా ప్రతిరోజూ చదవాల్సిన కథ యిది. బిడ్డలెలావుండాలో చెప్పిన ఉత్తరం “అబ్రహాం లింకన్ వారి పిల్లవాని టీచర్ కు రాసిన ఉత్తరం”. దీనిని “ఉపాధ్యాయునికి పిల్లలకు ఎలా నేర్పాలో” అని హెడ్డింగ్ మార్చితే బాగుంటుంది. ఇది యిప్పటికే చాలాచోట్ల ప్రచురితమైంది. ప్రతి టీచరూ చదవాల్సిన ఉత్తరం. లింకన్ టీచర్లకు చక్కని బోధ చేశారు. టీచర్లు పిల్లలతో ఎలా వుండాలో, వారికి చదువెలా నేర్పించాలో ఉత్తరం చక్కగా మార్గదర్శకం చేస్తుంది. ఈ పుస్తకానికి హైలైట్ శ్రీ కత్తి నరసింహా రెడ్డి గారి ముందు మాట, మరియు వారి యొక్క స్వీయ చరిత్ర వ్యాసం.

ఈ సంకలనంలో నాలుగైదు అనవసరం అనిపించాయి. వాటిని మలి ముద్రణలో తీసివేయవచ్చు. కొన్ని ఫరవాలేదు అనిపించాయి. అన్నీ మంచివే వేయలేరు కదా! వెరసి మంచి ప్రయత్నం.

ప్రతి కథ, వ్యాసం తర్వాత “గ్రాహ్యశం” అని సమ్మరీగా వేయడం చాలా బాగుంది. “గ్రాహ్యశం” బదులుగా సరళంగా గ్రహించవలసింది లేదా తెలుసుకోవలసింది అని వేస్తే బాగుండేది. పుస్తకంలో అక్కడక్కడా చురకల్లాంటి సూచనలుకూడా చేసారు. ఇవికూడా పుస్తకానికి తగినట్టుగా చక్కగా అమిరాయి.

నాకు నచ్చనివి. కథలనూ, వ్యాసాలనూ మొదటగా ఎప్పుడు, దేనిలో ప్రచురించారో చెప్పలేదు. రచయితల గురించి కొంత సమాచారం ఇస్తే బాగుండేది. రాసినవారికి ధన్యవాదాలు చెప్పలేదు. వారి అనుమతి తీసుకున్నదీ, లేనిదీ కూడా తెలియజేయలేదు. పేపర్ క్వాలిటీ కూడా పెంచాల్సిన అవసరం వుంది.

ఇంతటి మంచి కథలను, వ్యాసాలను సంకలనం చేసిన ఎస్టీయు వారు, ముఖ్యంగా సంపాదకులు కత్తి నరసింహారెడ్డి గారు అభినందనీయులు. ఈ పుస్తకం ఆంధ్రప్రదేశ్ లోని టీచర్లందరినీ ఆలోచింపజేయగలదని తద్వారా వారు విద్యార్థులకు చక్కగా చదువు చెపుతారని ఆశిద్దాం.

ప్రతి ఉపాధ్యాయుడు/ ఉపాధ్యాయురాలు, పిల్లల భవిష్యత్తు గురించి ఆలోచించే తల్లిదండ్రులందరూ చదవాల్సిన పుస్తకం “టీచరు: కథ – కమామిషు”.

టీచరు: కథ – కమామిషు
ఆగష్టు 2012
సంపాదకులు: కత్తి నరసింహారెడ్డి
ప్రచురణ: ఎస్టీయు, హైదరాబాద్
ఫోన్ నెం: 040 – 24655753
ప్రతులకు: విశాలాంధ్ర బుక్ హౌస్
పేజీలు: 231
ధర: రూ.150