రండి … రాజకీయాల్లోకి

లోక్‌సత్తా పార్టీ ఆవిర్భావం తరువాత, నాకు పరిచయం ఉన్న నా ఈడు స్నేహితులు కొద్ది మంది ఏదో ఒక విధంగా ఆ పార్టీ కార్యకలాపాల్లో పాలు పంచుకోవడం మొదలుపెట్టారు. అలాగని వాళ్ళవాళ్ళ ఉద్యోగాలు గట్రా మానుకుని కాదు. తీరిక వేళల్లో అన్నమాట. లోక్ సత్తా పార్టీ వారి ప్రకారం – సమాజాభివృద్ధి కోసం పనిచేసే ఒక రాజకియ పార్టీతో పనిచేయాలంటే, పార్టీ జెండాలు పట్టుకుని ఊళ్ళమ్మట తిరుగుతూ కుటుంబాన్ని నిర్లక్ష్యం చేయనక్కర్లేదు. మన రోజూవారి ఉద్యోగం, పనులు చేసుకుంటూనే కొంతసమయం సమాజం కోసం వినియోగించవచ్చు. అది ఎలాగంటే…. : అంటూ ఈ దిశలో సాగిన ఒక ఉపోద్ఘాతం ఈ పుస్తకం.

“పరిపాలన పూర్తిగా ప్రజల చేతుల్లోనే ఉండాలంటే, అవినీతి లేని భారతదేశాన్ని చూడాలంటే కొత్త తరం యువత రాజకీయాల్లోకి రావాల్సిందే” – లోక్‌సత్తా అధ్యక్షుడు జేపీ అన్న పై వాక్యమే ఈ పుస్తకం రాయడం వెనుక ఉద్దేశ్యం, ఈ పుస్తకం సాధించదలుచుకున్న లక్ష్యం. చిన్న చిన్న సెక్షన్లుగా విడగొట్టి మన దేశంలో పరిపాలనా వ్యవస్థలోని సమస్యలను గురించి మొదట చెప్పి, మార్పు కావాలంటే రాజకీయాల్లోకి కొత్త రక్తం రావాలి అని చెబుతూ, ఈ దిశగా వెళ్ళాలనుకుంటే ఎక్కడ నుండి మొదలుపెట్టాలి? ఎవరితో కలిసి పని చేయాలి? – వంటి విషయాలతో కూడిన FAQ వంటి పుస్తకం ఇది.

ఏముందీ పుస్తకంలో?

మన రాజకీయాలు ఎంత దారుణమైన స్థితిలో ఉన్నాయో మొదట క్లుప్తంగా ఉదాహరణలతో చెప్పి – అసలు ఈ పరిస్థితి బాగవుతుందా? అన్న ప్రశ్నతో మొదలుపెట్టారు చర్చ. ఇక్కడే ప్రజాధనం ఎలా ఖర్చవుతోంది, వివిధ రంగాల్లో అవినీతి ఎలా పెచ్చరిల్లుతోంది? ఈ విధంగా మన వ్యవస్థ పతనం కావడంలో మామూలు పౌరులమైన మన పాత్ర ఎంత? – వీటిపై క్లుప్తంగా చెప్పాక, ఈ పరిస్థితుల్లో కూడా ప్రయత్నిస్తే వ్యవస్థ బాగుపడే సూచనలు ఉన్నాయి అంటూ, ఇటీవలి కాలంలో కాస్త మెరుగుపడ్డ పరిస్థితుల గురించి ప్రస్తావించారు.

ఈ దిశలోనే మొదలైన లోక్ సత్తా వారి “సురాజ్య ఉద్యమం ఉద్దేశ్యాలు, లక్ష్యాలు ..ప్రజలు చైతనవంతం కావాల్సిన అవసరం గురించి కూడా క్లుప్తంగా చెప్పాక, అసలు ఈ పుస్తకం ఎందుకు రాశారో ఆ విషయంలోకి వచ్చారు.

అదే – రాజకీయాలంటే ఏమిటి? అందులోకి రావాలంటే ఎలాంటి అనుభవం కావాలి? కొత్తగా ఆసక్తి చూపుతున్న యువతీ యువకులు ఎలాంటి పనుల ద్వారా రాజకీయాల్లోకి క్రమంగా అడుగుపెట్టవచ్చు (ఉదా: క్షేత్రస్థాయి అవగాహన, కార్య నిర్వహణ)? ఇలా అడుగుపెట్టాలి అనుకునేవారికి కావాల్సిన ప్రాథమిక సమాచారం ఎక్కడ లభిస్తుంది? కావాల్సిన విషయ పరిజ్ఞానం ఎక్కడ సంపాదించుకోవచ్చు? రాజకీయ శిక్షణ ఎంత అవసరం? ఎక్కడ పొందవచ్చు? : ఇవన్నీ ఈ పుస్తకంలో చర్చించబడ్డ అంశాలు. అలాగే, రాజకీయాల్లో చేరాలి అనుకుంటే లోక్ సత్తానే ఎందుకు ఎంచుకోవాలి – అన్నది కూడా అంతర్లీనంగా ఉన్న ఒక థీం ఈ పుస్తకంలో.

పుస్తకమే చిన్నది. ఇంతకంటే వివరంగా నేను రాశానంటే బాగోదు. కనుక, నాకు నచ్చిన, నచ్చని కొన్ని అంశాలని ప్రస్తావిస్తాను.

నాకు నచ్చిన కొన్ని అంశాలు:
* పుస్తకం మొదట్లోనే కొందరు పార్టీ సభ్యులైన యువకులు క్లుప్తంగా చెప్పుకున్న తమ అనుభవాలు ఉన్నాయి. చాలా తక్కువ వాక్యాలే ఉన్నా, నన్ను బాగా ఆకట్టుకున్నాయవి.
* ఒక రాజకీయ పార్టీ ఇలా యువతీయువకులకోసం పిలుపునిస్తూ పుస్తకం వెలువరించడం అన్నది నేను ముందు ఎప్పుడూ చూడలేదు (అదే, నేనెప్పుడూ ఇలాంటివి చదవలేదు). నాకు ఈ ఆలోచన బాగా నచ్చింది.
* అలాగే, రాజకీయంగా క్రియాశీలక పాత్ర పోషించాలనుకునే వారికి ఒక కెరీర్ గ్రాఫ్ వంటిది స్కెచ్ చేసిన విధానం నాకు నచ్చింది.

నచ్చని కొన్ని అంశాలు:
* నిజంగా ఈ పుస్తకం ఎవర్ని ఉద్దేశించి రాశారో, వారు చదివి, ఉత్సాహవంతంగా లోక్ సత్తాలో చేరి వారి సామాజిక కార్యకలాపాల్లో చురుగ్గా పాల్గొనాలి అంటే – ఈ పుస్తకం దానికి చాలా చిన్నది అని అనిపించింది. ఈ వివరాల వల్ల, బహుశా ఎలాగో త్వరలో క్రియాశీలకంగా ఏదో చేయబోయే వారు లాభపడతారు కానీ, ఆ సరిహద్దుల్లో లేకుండా, ఆ అసక్తి అంతగా చూపెట్టని వారికి ఈ పుస్తకం అంత ఆకర్షణీయంగా ఉండదు, ఒక వేళ చదివినా, అంత compelling గా ఉండదు – అనిపించింది నాకు. దానికి మరింత శ్రమతో, మరీంత వివరంగా, కొంచెం పెద్ద పుస్తకమే రాయాల్సి ఉంటుంది అనుకుంటాను.

* అన్ని గణాంకాలకీ ఆధారమైన రిపోర్టుల తాలూకా రిఫరెన్సులు కూడా జతచేసి ఉంటే, పుస్తకానికి ఒక నిండుదనం, ఒక కొత్త విలువ వచ్చి ఉండేవి అని అనిపించింది.

* అలాగే, నా మట్టుకు నాకు, పుస్తకం చదివాక దొరికిన సమాధానాలకంటే కలిగిన సందేహాలే ఎక్కువ. ఒక విధంగా అది మంచిదే అయినా కూడా, పాలనా వ్యవహారాలలో లోక్ సత్తా వారి పాత్ర గురించి, సాంఘిక జీవితంలో లోక్ సత్తా వారి కార్యకలాపాల గురించి మరింత వివరంగా రాసి ఉంటే బాగుండేది అనిపించింది.

* ధర కొంచెం ఎక్కువనిపించింది కానీ, ఇటీవలి కాలంలోనే మరిన్ని వివరాలతో, కొంచెం ధర తగ్గించి మరీ ఈ పుస్తకాన్ని విడుదల చేశారు అని తెలిసింది.

ఇందాకే అన్నట్లు, మామూలు యువతీయువకులని రాజకీయాల్లోకి రమ్మని ఆహ్వానిస్తూ, ఏం చేయొచ్చో ప్రాథమిక అవగాహన కలిగిస్తూ, ఒక రాజకీయ పార్టీ వెలువరించిన పుస్తకాలు నాకింకేవీ తెలియదు కనుక ఇలాంటి పుస్తకం ఒకటి తెచ్చినందుకు సురేశ్ గారికి, లోక్‌సత్తా పార్టీకీ అభినందనలు.

****
పుస్తకం వివరాలు:
రండి … రాజకీయాల్లోకి – యువతకు జేపీ పిలుపు
రచన: సురేశ్ వెలుగూరి
ముద్రణ: నవంబర్ 2012
పేజీలు: 83
వెల: 80 రూపాయలు (లైబ్రరీ కాపీ – 100 రూపాయలు)
కాపీలకు: imprexindia@gmail.com, అన్ని ప్రముఖ పుస్తకాల షాపుల్లోనూ దొరుకుతుందట.
(రెండవ ముద్రణ ఇటీవలే వచ్చింది. వివరాలు తెలియవు.)