మేఘమాల నవల

వ్యాసకర్త: బి. కృష్ణచైతన్య

************

ఈ మధ్య నేను చదివిన మంచి నవలల్లో మల్లాది వెంకటకృష్ణ మూర్తి గారు రాసిన ‘మేఘమాల ‘ ఒకటి. 

టైటిల్ చూసిన వెంటనే ఇదేదో లేడీ ఓరియెంటెడ్ కథ,ఇంకా డ్రామా, ప్రేమ ఇవన్నీ ఉంటాయి, బాగా బోర్ అనుకున్నాను. 

ఎప్పుడూ మర్డర్ మిస్టరీ, క్రైమ్, కామెడీ చదివే నేను ఫామిలీ డ్రామా, సాంఘిక కథలు చదవలేను అనుకుంటూ అలాంటి కథలను, నవలలను పట్టించుకొనేవాడిని కాదు. కానీ ‘మేఘమాల’ చదివిన తరవాత ఉద్దేశం కొద్దిగా మార్చుకోక తప్పలేదు.

పుస్తకం తెరిచిన వెంటనే ఈ కోట్ మనకు కనిపిస్తుంది “A novel is a fountain of thoughts”. మూడో పేజీ నుంచే కథ వేగం అందుకుంటుంది. కథలోకి ఎంత తొందరగా వెళ్ళిపోవాలి అన్నది కొత్తగా కథలు వ్రాయాలి అనుకునే ప్రతి ఒక్కరికి ఇది ఉపయోగపడుతుంది. స్టీఫెన్ కింగ్ కథలు ఇందుకు పూర్తి విరుద్ధం.

ఇంక కథలోకి వస్తే , హీరో సారథికి తొమ్మిదేళ్లకే ఒక బొమ్మల పెళ్లి లాంటిది జరిగిపోతుంది. 

సారథికి పెళ్లీడు వచ్చిన తర్వాత తనభార్య మేఘమాల కోసం వెతకడం మొదలుపెడతాడు. 

ఈ అన్వేషణలో ఎంతో మందిని కలుస్తాడు, ఎన్నో ఊళ్లు తిరుగుతాడు. ఎన్నో జీవిత పాఠాలను నేర్చుకుంటాడు.

చివరికి సారథి మేఘమాలను వెతికి పట్టుకుంటాడా లేదా? ఇది క్లైమాక్స్. టూకీగా ఇదికథ. 

నవల ఎక్కడా బోర్ కొట్టదు. కథలో సారథి మేఘమాలను వెతికి పట్టుకుంటాడా, లేదా అనే ఉత్కంఠ పేజీలను తిప్పేలా చేస్తుంది. మేఘమాల ఎలాంటి అమ్మాయి,ఎట్లా ఉంటుంది, ఈ విషయాలన్నీ ఇతరుల ద్వారా సారథికి, నవల చదివే మనకు తెలుస్తూ ఉంటుంది. ఇది ఒక విధంగా మల్లాది గారు చేసిన ప్రయోగం అనుకోవచ్చు.

“చంటబ్బాయ్” నవలలో కొడుకు కోసం అన్వేషణ, ఈ నవల లో భార్య కోసం అన్వేషణ . 

ఒక ఫామిలీ స్టోరీ లో మంచి అన్వేషణకరెక్టుగా కలిపి రాస్తే అది ‘మేఘమాల’ అవుతుంది .