పుస్తకం.నెట్ మూడో వార్షికోత్సవం

జనవరి 1 – నూతన సంవత్సర ఆగమనోత్సవమే కాక, పుస్తకం.నెట్ వార్షికోత్సవం కూడా! నేటితో పుస్తకం.నెట్ మొదలుపెట్టి మూడేళ్ళు పూర్తయ్యి, నాలుగో సంవత్సరంలో అడుగిడుతున్నాము. ’పుస్తకం’ అభిమానులకు, వ్యాసకర్తలకు, చదువరులకు నూతన సంవత్సర శుభాకాంక్షలతో పాటు, పుస్తకం.నెట్ వార్షికోత్సవ శుభాభినందనలూనూ.గడిచిన ఏడాదిలో ’పుస్తకం’ ప్రస్థానం గురించి చెప్పుకోవాలంటే:

2011లో పుస్తక ప్రస్థానం, సంఖ్యల్లో:వ్యాసాలు: 268
వ్యాఖ్యలు: 3210
హిట్స్:  211049

మూడేళ్ళల్లో పుస్తకం సాధించుకున్న అంకెలు:వ్యాసాలు: 853
వ్యాఖ్యలు: 5660
హిట్స్:  557,800

వ్యాసపరంపర:

• ప్రతి ఏడాదిలానే, చినుకు చినుకు రాలి సముద్రం అయినట్టు, ఒక్కోరు తలా ఓ చేయి వేయటం వల్ల దాదాపుగా  270 వ్యాసాలు ప్రచురితమయ్యాయి.
• జంపాల చౌదరిగారు గడిచిన ఏడాదిలో నిరాటంకంగా యాభై రెండు వారాల పాటు, యాభై రెండు వ్యాసాలతో అనేకానేక పుస్తకాలను పరిచయం చేసారు.
• మల్లిన నరసింహరావుగారు – అభినయ దర్పణం, ఆంధ్ర మహాభారతం పేరిట రెండు శీర్షికలు నిర్వహిస్తూ ప్రాచీన గ్రంథాలను పునర్పరిచయం చేస్తున్నారు.
• గతంలో లాగానే 2011లో కూడా, పాత-కొత్త, సాహిత్యం-సాంకేతికం, కథ-వ్యాసం తెలుగు-ఇంగ్లీష్ అన్న భేదాలు లేకుండా అన్ని రకాల పుస్తకాల గురించి ఎన్నో వ్యాసాలు వచ్చాయి. కొన్ని ఇతర పత్రికల్లో వచ్చిన వ్యాసాలను, కొన్ని పుస్తకాల ముందు మాటలను కూడా ప్రచురించటం జరిగింది.
• నండూరి, ముళ్ళపూడిగార్ల గురించి వచ్చిన అరుదైన వ్యాసాలు, వారి కుటుంబసభ్యుల ద్వారా!

ఒడిదుడుకులు:

 

• అనూహ్యంగా సైట్‍ను ఒక పది రోజుల పాటు మూసివేయాల్సి వచ్చింది, సాంకేతిక ఇబ్బందుల వల్ల. పుస్తకం.నెట్ పాఠకులకు ఓ మాట చెప్పే వీలు కూడా లేని పరిస్థితుల్లో సైట్‍ను నిలిపివేయాల్సి పరిస్థితుల్లో కూడా మాకు అండదండగా ఉన్న పొద్దువారి గురించి, తమ తమ వ్యాసాల ప్రచురణలో జరిగిన జాప్యాన్ని సహృదయంతో అర్థం చేసుకున్న  వ్యాసకర్తల గురించి, అన్ని రోజులూ ఓపికతో వేచి చూసిన ’పుస్తకం’ చదువరుల గురించి ప్రత్యేకంగా చెప్పుకోవాల్సి ఉంది.

• దాదాపుగా మూడేళ్ళ తర్వాత ’పుస్తకం’కు ఒక కొత్త ఆకృతినీ, ఆకారాన్ని ఇవ్వదల్చి కొత్త థీం‍ను ప్రవేశపెట్టాము. కాకపోతే, పైన చెప్పిన సాంకేతిక కారణల వల్ల జరిగిన జాప్యానికి, ఈ థీం‍ పనులను కూడా చేర్చి మరింత ఆలస్యం చేయకూడదని, ఆ థీం‍ను ఆదరాబాదరగా పెట్టటం జరిగింది. సమయానుకూలంగా తగిన మార్పులూ, చేర్పులూ చేసి ఒక తీరైన సైట్‍ను మీ ముందు నిలిపాలన్నది మా అభిమతం. అంతవరకూ ఓపికతో భరిస్తున్నందుకు చదువురలకు ప్రత్యేక ధన్యవాదాలు. అలాగే థీం మార్చగానే అందులోని లోటుపాటులని సవివరంగా చెప్తూ మెయిల్స్, కాల్స్ ద్వారా తెలిపినవారికి కూడా కృతజ్ఞతలు.
• కొత్త థీం వల్ల “మీరేం చదివారు?”, “చెప్పాలని ఉందా?” పేజీలను తాత్కాలికంగా తీసివేయటం జరిగింది. త్వరలోనే పునఃప్రవేశపెట్టబడతాయి.
• వ్యాసకర్తలకూ, వ్యాఖ్యాతలకూ అభిప్రాయభేధాలు కలిగే చెదురుమదురు సంఘటనలలో నిర్వాహకులను తప్పుబట్టటం పరిపాటిగా మారింది. పుస్తకంలో వచ్చే వ్యాసాల్లో వెలిబుచ్చిన అభిప్రాయాలు ఆయా వ్యాసకర్తలవే గానీ నిర్వాహుకలవి కావు. వ్యాసకర్తతో విభేధించదలచినవారు విషయపరంగా చర్చను లేవదీసి, అభ్యంతరకర, అసభ్యపదజాలాలు, వ్యక్తిగత దూషణలకు పోకుండా ఉండమని మనవి.

ఇక పై:

• పుస్తకం థీం విషయంలో మార్పులూ చేర్పులూ చేసి చదువరులకు అనువుగా సైట్‍ను తీర్చిదిద్దాలన్నది ప్రథమ లక్ష్యం. వెనువెంటనే చేయలేకపోయినా, వీలైనంతగా దీన్ని సాధించటానికి ప్రయత్నిస్తాం.
• పుస్తకం.నెట్‍లో పుస్తక పరిచయాలే ఎక్కువగా రాయబడుతున్నాయి. అవే కాక, మరేమేం రాయచ్చు అనే దాని గురించి మరొక్క సారి:
• ఏ భాష పుస్తకమైనా, దేనికి సంబంధించిన పుస్తకమైనా : దానిపై మీ అభిప్రాయాలూ, మీ పఠనానుభవాలు, పరిచయాలు, విశ్లేషణలు, విమర్శలు ఏవైనా…
• మీకు నచ్చిన రచయిత గురించి మ్యూజింగ్స్
• పుస్తక ప్రదర్శనలలో మీ అనుభవాల గురించి
• పుస్తక విక్రేతలతోనో, పుస్తక ప్రియులతోనో, రచయితలతోనో, ఇతర చదువరులతోనో : పుస్తకాల గురించిన మాటామంతీ
• పుస్తకావిష్కరణ గురించో, పుస్తకాల అమ్మకం గురించో మరే పుస్తక ప్రపంచ సంబంధిత విషయం గురించైనా వార్తలు
• ఆన్లైన్ లో చదివిన వ్యాసాల గురించి, ఈపుస్తకాల గురించి, ఆడియో పుస్తకాల గురించి
• కాపీరైట్ల వంటి సమస్యలు లేని పాత తరం వ్యాసాలను యూనీకోడీకరించడం
• …. ఇలా చెప్పుకుంటూ పోతే, పుస్తక ప్రపంచంతో సంబంధం ఉన్న ఏ అంశం గురించైనా, పుస్తకం.నెట్ లో ఉండదగ్గదే!

కృతజ్ఞతలు:

• సైటు నిర్వహణ విషయంలో ఎప్పట్లాగే ఎంతో సహకరించిన “పొద్దు” బృందానికి ధన్యవాదాలు.
• కొన్ని వ్యాసాలు పునర్ముద్రణకు అంగీకరించిన “వీక్షణం” పత్రిక వారికీ, డీటీఎల్సీ వారికి, “పెన్నాతీరం” రచయిత ఈతకోట సుబ్బారావు గారికి
• మధ్యలో ఒక పదిరోజులు సైటు మూసివేయబడ్డా  కూడా విసుక్కోకుండా, కొత్త రూపును దిద్దడంలో మేము నెమ్మదిగా సాగుతున్నా కూడా మమ్మల్ని ఆదరిస్తూ, ప్రోత్సహిస్తూనే ఉన్న అందరికీ మరొక్కసారి ధన్యవాదాలు.
• ఏమాత్రం తరగని ఉత్సాహంతో క్రమం తప్పకుండా విభిన్నమైన పుస్తకాల గురించి రాస్తూ, ఎన్నో కొత్త విషయాలను తెలియజేస్తూ, మాకు ఎంతో స్పూర్తిని కలిగిస్తున్న జంపాల, మల్లిన గార్లకి ప్రత్యేకంగా ధన్యవాదాలు.
• తమ తమ బ్లాగుల్లో ప్రచురించుకునే అవకాశం ఉన్నా,’ పుస్తకం’ ను పుస్తకాభిమానుల వేదికగా గుర్తించి తమ వ్యాసాలను పంపి ప్రోత్సహిస్తున్న ప్రతి వ్యాసకర్తకూ కృతజ్ఞతాభివందనాలు! వీరే లేకపోయుంటే పుస్తకం ఇంత నిరాటంకంగా నడవడం అసాధ్యమయ్యేది.

 

ఈ మూడేళ్ళలో లాగానే, మీరంతా సహాయసహకారాలు అందించి, విరివిగా వ్యాసాలు రాసి, మన పుస్తకం‍.నెట్‍ పురోగతికి తోడ్పడగలరని ఆశిస్తున్నాము.

అందరికీ నూతన సంవత్సర శుభాకాంక్షలు!

ఇవి గాక, మీ సలహాలూ, సూచనలూ ఇక్కడ వ్యాఖ్యల ద్వారానో, editor@pustakam.net కు వేగు ద్వారా తెలియజేయగలరు.