“కలగూరగంప”, “రచ్చబండ చర్చలు”

వ్యాసకర్త: కిరణ్ ప్రభ

(కిరణ్ ప్రభ గారు సిలికాన్ వాలీ – అమెరికా, ప్రముఖ తెలుగు రచయిత, ‘కౌముది’ అంతర్జాల పత్రిక ప్రధాన సంపాదకులు, వక్త, మరియు పరిశోధనాత్మక టాక్ షో వ్యాఖ్యాత)

*******

• పుస్తకాల పేర్లు: “కలగూరగంప”, “రచ్చబండ చర్చలు”
• రచయిత పేరు: వెంకట్ నాగం
• ప్రచురణకర్త: వంగూరి ఫౌండేషన్ – అమెరికా 
• పేజీలు: 141 (“కలగూరగంప”), 328 (“రచ్చబండ చర్చలు”) 
• ధర: రూ. 100/- (“కలగూరగంప”), రూ. 400/- (“రచ్చబండ చర్చలు”)
• పుస్తక ఉద్దేశ్యం: సామాజిక, సాహిత్య, చారిత్రక, సమకాలీన అంశాలపై రచయిత చూపిన లోతైన అవగాహనను, విశ్లేషణాత్మక దృక్కోణాన్ని ప్రతిబింబించే విలువైన వ్యాసాల సంకలనాలే ఈ గ్రంథాలు.

సాహితీ మిత్రులు వెంకట్ నాగం గారు రచించిన ఈ రెండు విశిష్ట పుస్తకాలను నేను సిలికాన్ వాలీ లో అందుకున్నాను. ఆ తరువాత ఆగస్టు 19, 2026న కాలిఫోర్నియా బే ఏరియా నగరమైన నెవార్క్‌లో “వీక్షణం – సాహితీ గవాక్షం” 14వ వార్షికోత్సవ వేదిక సాక్షిగా, సాహిత్య పరిమళాల నడుమ ఈ రెండు పుస్తకాల ఆవిష్కరణ కార్యక్రమం జరిగింది. ‘నెచ్చెలి’ పత్రిక ప్రధాన సంపాదకురాలు డా. కె. గీతామాధవి, శ్రీమతి రమణ, శ్రీమతి శారద కాశీవఝుల, శ్రీమతి షంషాద్, డా. సురేందర్ రెడ్డి, శ్రీ వెంకట్ నాగం, శ్రీమతి వాణి నాగం మరియు పలువురు సాహితీ మిత్రుల సమక్షంలో జరిగిన ఈ వేడుకలో నేను ముఖ్య అతిథిగా పాల్గొని రెండు పుస్తకాలను ఆవిష్కరించడంతో పాటు వాటిపై సమీక్షా ప్రసంగం చేయడం ఆనందదాయకం.

‘కలగూరగంప’ మరియు ‘రచ్చబండ చర్చలు’ – ఈ పుస్తకాలు రెండూ వెంకట్ నాగం గారు రచించిన శీర్షికలు, కాలమ్స్ తో నిండిన రెండు వ్యాస సంపుటాలు. ఇలాంటి శీర్షికలు, కాలమ్స్ రాయడానికి ఒక ప్రత్యేకమైన కళ ఉండాలి. మామూలుగా కథలు, కవితలు వంటి కాల్పనిక సాహిత్యం రాయడం ఒకెత్తయితే, ఇలాంటి శీర్షికలు-కాలమ్స్ రాయడం మరొక ఎత్తు. పూర్వం మాలతీ చందూర్ గారితో మొదలుపెట్టి, గొల్లపూడి మారుతీరావు గారి వరకు వారం వారం, నెల నెల రాసిన కాలమ్స్ మనం చూశాం. ఇలాంటి శీర్షికలు, కాలమ్స్ రాయడానికి ఒక ప్రత్యేకమైన కృషి, ప్రత్యేకమైన దృష్టి, ప్రత్యేకమైన శైలి, ప్రత్యేకమైన భాష ఉండాలి.

ఎందుకంటే ఇవి నెల నెల వెంకట్ నాగం గారు రాసినవి. ఉదాహరణకు, ‘రచ్చబండ చర్చలు’ అనేది ‘సిరిమల్లె’ పత్రికలో నెల నెల వచ్చిన కాలమ్స్. ఇందులో ఏ విషయం తీసుకున్నా, దానికి సరైన ఆరంభం, పొడిగింపు, ముగింపు ఉండేలా ఒక చక్కటి నిర్మాణంలో రాశారు. అలాగే ఆయన ఎంచుకున్న అంశాల వైవిధ్యం కూడా చాలా గొప్పది. ఒకే రకమైన అంశానికి పరిమితం కాకుండా చరిత్ర, సాహిత్యం, సమకాలీన రాజకీయాలు, ఇలా విభిన్న అంశాలపైనా తన ప్రత్యేక దృష్టితో పాటు శ్రద్ధతో రాశారు.

కథలు, కవితలు రాసే శైలి వేరు, కాలమ్స్ రాసే శైలి వేరు. ముఖ్యంగా ‘కలగూరగంప’లో ఉన్నవి చాలా వరకు తెలుగునాడులోని పత్రికలలో వచ్చిన వ్యాసాలు. పత్రికలకు రాసేటప్పుడు కొంత పరిమితి ఉంటుంది, ఇంత నిడివిలోనే ఉండాలి, ఇన్ని పదాల్లోనే ఉండాలి అని. ఆ పరిమితులకు లోబడి చెప్పదలుచుకున్న అంశాన్ని ఆకర్షణీయంగా చెప్పాలి. ముఖ్యంగా శీర్షికలకు ముగింపు ఎంత ప్రతిభావంతంగా ఉండాలనేది చాలా ముఖ్యం. వీటన్నిటినీ వెంకట్ నాగం గారు తన వ్యాసాలలో చాలా చక్కగా నిర్వహించారు.

అమెరికాలో ఉండి ఇలా కాలమ్స్ రాసేవాళ్ళు చాలా తక్కువ మంది ఉన్నారు. కథలు, కవితలు, నవలలు రాసే రచయితలు చాలామంది ఉన్నారు గానీ, కాలమ్స్ రాసే ప్రక్రియలో ప్రావీణ్యం సంపాదించినవారు చాలా కొద్దిమంది, ఉదాహరణకు వంగూరి చిట్టెం రాజు గారు, మందపాటి సత్యం గారు, డా. కె. గీతా మాధవి గారు, ఇప్పుడు వెంకట్ నాగం గారు.

వెంకట్ నాగం గారి వ్యాసాలు చదివాను, ఇవి కేవలం కాలక్షేపం కోసం రాసినవి కావు. విశ్లేషణలు, కొత్త విషయాలను సరికొత్త కోణంలో పరిచయం చేయడం ఇందులో కనిపిస్తాయి. వీరు రాసిన ఒక్కొక్క వ్యాసం గురించి మాట్లాడుకోవాలంటే మనం కనీసం పదిహేను నిమిషాల నుంచి ముప్పై నిమిషాల వరకు మాట్లాడుకోవచ్చు. చక్కటి శైలి, ఆవిష్కరణ, వాక్య నిర్మాణంలో సమతుల్యత, ఆలోచనల పటుత్వం – ఈ సంక్లిష్ట ప్రక్రియలన్నింటినీ వారు అద్భుతంగా నిర్వహించారు! ఇలాంటి కళను వారు పెంపొందించుకుని, శీర్షికలు, కాలమ్స్ గా ప్రముఖ పత్రికలలో ప్రచురించడమే కాకుండా వాటన్నిటినీ కలిపి రెండు పుస్తకాల రూపంలో తీసుకొచ్చి, విశాల పాఠక సమాజానికి అందుబాటులో ఉంచినందుకు వెంకట్ గారు, మిమ్మల్ని మనస్ఫూర్తిగా అభినందిస్తున్నాను. 

వెంకట్ నాగం గారు రాసిన సాహిత్యం కేవలం అమెరికాకే పరిమితమైపోకుండా – చరిత్ర, భారతదేశంలోని సమకాలీన రాజకీయాలు, అమెరికా రాజకీయాలు, అన్నిటినీ స్పృశించింది. ఇదొక అద్భుతమైన ప్రయోగం. వెంకట్ గారు, మీరు చేసిన ఈ ప్రయోగం కలకాలం నిలిచిపోతుంది. ఈ రెండు పుస్తకాలను ఎవరు చదివినా తప్పకుండా మిమ్మల్ని అభినందిస్తారు.

‘కలగూరగంప’ పుస్తకం పైన ఒక సందేశం రాశారు చూడండి, “మనము విషయాలను ఎలా చూస్తామో, మనము అవే విషయాలుగా మారిపోతాం”. ఇటీవలే నేను ఒక తత్వవేత్త గురించి చెప్పాను, ఆయన కూడా సరిగ్గా ఇదే విషయం చెప్పారు. కలగూరగంప పుస్తకం ముఖచిత్రంపై ఉన్న “ప్రశ్నించే ఆలోచనలు, మనసుని కదిలించే ప్రతిబింబాలు, మాట్లాడే పదాలు”, నిజంగానే ఈ పుస్తకంలోని పదాలన్నీ మాట్లాడే పదాలండి! ఎవరో మన పక్కన కూర్చుని మనతో వివరంగా చెప్తున్నట్టుగా ఉంటుంది.

2001 నుండి ఇన్ని సంవత్సరాలుగా నిలకడగా రాయడమే కాకుండా, వీటిని శ్రద్ధగా పుస్తకాల రూపంలో తీసుకొచ్చి, కలకాలం గుర్తుండేలా చేసినందుకు వెంకట్ నాగం గారికి హృదయపూర్వక అభినందనలు. 

ప్రస్తుతం ఈ రెండు పుస్తకాలూ ‘అచ్చంగా తెలుగు’ మరియు ‘నవోదయ’ వెబ్‌సైట్లలో సాహితీ ప్రియులకు అందుబాటులో ఉన్నాయి. ఆలోచన, విశ్లేషణ, అన్వేషణ, ఈ మూడు అంచుల్లోనూ నిలిచే రచనలను పాఠకులకు చేరువ చేస్తూ, వాటిని గ్రంథరూపంలో అమర్చిన వెంకట్ నాగం గారి ప్రయత్నం ప్రశంసనీయం. ఇలాంటి మరిన్ని ఉత్తమమైన రచనలు వారి కలం నుండి వెలువడాలని హృదయపూర్వకంగా ఆశిస్తున్నాను. తెలుగు సాహిత్యంలో తన ప్రత్యేక ముద్రను వేస్తూ ముందుకు సాగుతున్న వెంకట్ గారి తదుపరి గ్రంథం కోసం ఆసక్తిగా ఎదురు చూస్తూ…

ధన్యవాదాలు!

కిరణ్ ప్రభ