రచ్చబండ చర్చలు – వెంకట్ నాగం పుస్తకానికి ఆప్తవాక్యం

వ్యాసకర్త: వంగూరి చిట్టెన్‌రాజు

*********

“రచ్చబండ చర్చలు” అనే శీర్షికలోనే ఒక ఆత్మీయత ఉంది. మన ఊరి రచ్చబండ వద్ద జరిగే చర్చల్లో ఉండే సహజత్వం, సామాజిక స్పృహ, హాస్యం, ఆలోచన, అనుభవం – అన్నీ ఈ వ్యాసాల్లో ప్రతిధ్వనిస్తాయి. రచయిత వెంకట్ నాగం గారి రచనలు చదువుతుంటే పాఠకుడు కూడా ఆ రచ్చబండలో కూర్చొని సంభాషణలో భాగస్వామి అయిన అనుభూతిని పొందుతాడు.

వెంకట్ గారు కాలిఫోర్నియా రాష్ట్ర రాజధాని శాక్రమెంటోలో ప్రముఖ భారతీయ నాయకుడుగా, మరీ ముఖ్యంగా తెలుగుగళం ఎలుగెత్తి వినిపిస్తూ మన సాంస్కృతిక వారసత్వాన్ని పదిలంగా అమలుపరుస్తున్న నిస్వార్థ సేవకుడిగా నాకు అంతకు ముందు నుంచీ తెలిసినా… ఆయనతో నా సాహిత్య పరిచయం 2017లో ప్రారంభమైంది అని చెప్పవచ్చును. ఆ సంవత్సరం వంగూరి ఫౌండేషన్ ఆఫ్ అమెరికా నిర్వహించిన 22వ ఉగాది ఉత్తమ రచనల పోటీలో “నా మొట్ట మొదటి కథ” విభాగంలో ఆయన రచించిన “గోంగూర పురాణం” కథకు ప్రథమ బహుమతి లభించింది. ఆ కథలోని వినూత్న కథనం, హాస్యచతురత, సామాజిక పరిశీలన, భాషపై పట్టు ఆయనలో ఉన్న రచయితను స్పష్టంగా పరిచయం చేశాయి. ఒక మంచి రచయిత సాహిత్య ప్రపంచానికి పరిచయం కావడం ఎంత ముఖ్యమో, అటువంటి సందర్భాల్లో సాహిత్య సంస్థల పాత్ర ఎంత విలువైనదో ఆ సందర్భం మరోసారి నిరూపించింది.

ఆ తరువాత వెంకట్ గారి రచనా ప్రయాణం మరింత విస్తరించింది. శాక్రమెంటో తెలుగు సంఘం వార్తాపత్రికకు సంపాదకుడిగా శ్రీ వెంకట్ నాగం గారి ప్రస్థానం మొదలైనప్పుడు, ఆ ప్రయత్నం కాలక్రమేణా “శాక్రమెంటో తెలుగు వెలుగు” అనే తెలుగు పత్రికగా రూపుదిద్దుకోవడం ఎంతో ఆనందకరమైన పరిణామం. ఆ అన్ని దశలలోనూ వెంకట్ గారు మమ్మల్ని సంప్రదిస్తూ మా సూచనలు తీసుకోవడం ఆయన సహృదయానికి నిదర్శనం. విదేశాల్లో తెలుగు భాషా, సాహిత్య వికాసానికి ఇటువంటి ప్రయత్నాలు ఎంతో అవసరం.

ఇక మధు, ఉమ బుడమగుంట గార్లు తమ వ్యక్తిగత తపనతో సుమారు 2018 నుంచీ వెలువరిస్తున్న “సిరిమల్లె” పత్రికలో వైవిధ్యభరితమైన అనేక అంశాలని ఒక సాధారణ పాఠకుడిగా చదివి ఆనందించే నేను, జనవరి 2023 నుంచి ప్రారంభమైన వెంకట్ నాగం గారి ‘రచ్చబండ చర్చలకి” ఎప్పుడెప్పుడా అని ఎదురుచూడడం మొదలుపెట్టాను. దానికి కారణాలు అందరికీ తెలిసినవే… ఆ వ్యాసాల వైవిధ్యత, వెనకాల వెంకట్ గారి పరిశోధన, ఆయా పరిశోధనలను ఆసక్తి కరంగా చదివించే గుణంతో తీర్చిదిద్దిన రచనా నైపుణ్యం… అన్నింటికీ మించి ప్రతీ వ్యాసం నుంచీ మనకి అంతకు ముందు తెలియని విషయాలు ఎన్నెన్నో తెలుసుకునే అవకాశం అలవోకగా మనకి అందడం.

రచయితగా మాత్రమే కాకుండా, తెలుగు సాహిత్య, సమాజ సేవకుడిగా కూడా వెంకట్ గారి సేవలు ప్రశంసనీయమైనవి. గత అనేక సంవత్సరాలుగా అమెరికా తెలుగుసదస్సులు, అంతర్జాతీయ తెలుగుసదస్సులలో పరిశోధనా పత్రాలు సమర్పిస్తూ, వక్తగా పాల్గొంటూ తెలుగు భాష, సాహిత్యం, సంస్కృతికి సంబంధించిన విలువైన ఆలోచనలను పంచుకుంటున్నారు. తమ సహ సాహితీవేత్తలతో కలిసి సాహిత్య కార్యక్రమాలు, రచనా పోటీల నిర్వహణ ప్రవాసాంధ్రులలో తెలుగు పట్ల ఆసక్తిని పెంపొందిస్తున్నాయి. ప్రముఖ సాహితీవేత్తలను శాక్రమెంటో ఆహ్వానించి సత్కరించడం ఆయన ప్రవృత్తిలో ఒక భాగం. తెలుగుసాహిత్యం చిరస్థాయిగా నిలవాలంటే కొత్త రచయితలు నిరంతరం ముందుకు రావాలి. యువ రచయితలలో ఉన్న ప్రతిభను గుర్తించి వారికి సరైన వేదికను కల్పించడం మనందరి బాధ్యత. ఒక మంచి రచయిత ఒక్క రోజులో తయారుకాడు; ప్రోత్సాహం, మార్గదర్శకత్వం, ప్రచురణ అవకాశాలు అతని ప్రయాణాన్ని సుసంపన్నం చేస్తాయి. అందుకే కొత్తగా రాయాలనుకునే వారు ధైర్యంగా తమ రచనలను ప్రపంచం ముందుకు తీసుకురావాలి. ఆయా రచనలు ప్రచురించడం కూడా సాహిత్య సంస్థలు చేయవలసిన ముఖ్యమైన కర్తవ్యం. ఈ నేపథ్యంలో ఈ ‘రచ్చబండ చర్చలు” వ్యాససంపుటిని పుస్తకరూపంలో ప్రచురించే అవకాశం మాకు ఇచ్చిన వెంకట్ నాగం గారికి మా ధన్యవాదాలు తెలియజేసుకుంటున్నాను. ఇది వంగూరి ఫౌండేషన్ ఆఫ్ అమెరికా వారి 139వ ప్రచురణ.

“రచ్చబండ చర్చలు” పుస్తకం పాఠకులను అలరిస్తూనే ఆలోచింపజేస్తుందని నాకు పూర్తి విశ్వాసం ఉంది. ఈ గ్రంథం మరెన్నో మంచి రచనలకు నాంది కావాలని, రచయిత వెంకట్ నాగం గారి కలం మరింత సృజనాత్మకంగా సాగాలని హృదయపూర్వకంగా ఆకాంక్షిస్తూ…

భవదీయుడు, 

వంగూరి చిట్టెన్ రాజు 

వంగూరి ఫౌండేషన్ ఆఫ్ అమెరికా


పుస్తకం పేరు: “రచ్చబండ చర్చలు”

రచయిత పేరు: వెంకట్ నాగం

ప్రచురణకర్త: వంగూరి ఫౌండేషన్

ధర: రూ. 400/-

ISBN: 978‑1‑892408‑44‑0

పుస్తక ఉద్దేశ్యం: వర్తమాన, చారిత్రక అంశాలపై రచయిత ఆలోచనలను, సమాజంపై ఆయన దృష్టిని, అనుభవాలను, విలువలను పాఠకులకు చేరవేయడం; ఆలోచనను ప్రేరేపించడం; చర్చను ప్రారంభించడం; మరియు పాఠకుడితో ఒక ఆత్మీయ అనుసంధానం ఏర్పరచడం.

పుస్తకాల లభ్యత:  వెంకట్ నాగం గారు రచించిన రెండు పుస్తకాలు: “కలగూరగంప” వ్యాస సంపుటి మరియూ “రచ్చబండ చర్చలు” ‘అచ్చంగా తెలుగు’ మరియు ‘నవోదయ’ వెబ్‌సైట్లలో సాహితీ ప్రియులకు అందుబాటులో ఉన్నాయి. 

1.https://www.telugubooks.in/products/kalagoora-gampa?_pos=3&_sid=f7d33e68e&_ss=r

2.https://www.telugubooks.in/products/racchabanda-charchalu?_pos=4&_sid=f7d33e68e&_ss=r

3.https://books.acchamgatelugu.com/products/kalagoora-gampa

4.https://books.acchamgatelugu.com/products/racchabanda-charchalu