పెన్నాతీరం – ఈతకోట సుబ్బారావు

ఈపుస్తకం కొన్నాళ్ళ క్రితం ’ఆంధ్రజ్యోతి’ లో వారంవారం ఇదేపేరుతో వచ్చిన వ్యాసాల సంకలనం. ఈ వ్యాసాలన్నీ నెల్లూరు జిల్లా చారిత్రక విశేషాలను తెలియజేసేవే.

పుస్తకాన్ని – ’ఒంగోలు వెంకటరంగయ్య’ గారికి అంకితమిచ్చారు. ఈపుస్తకంలోకి తల దూర్చాకే అలాంటి ఒక మనిషి ఉన్నాడని తెలిసింది కానీ, ఆయన గురించి చదువుతూ ఉంటే ఆసక్తికరంగా అనిపించింది. ఇక పుస్తకం గురించి – వి.యస్. రామచంద్రరావు గారి ముందుమాటలో – నెల్లూరు జిల్లా విశేషాలను తెలుపుతూనే, ఈపుస్తకంలో రాసిన విషయాల గురించి కూడా చెప్పారు. బాగా రాసారు.

పుస్తకం లోపలికెళ్తే – నెల్లూరు జిల్లా తొలి గ్రాడ్యుయేట్, తొలి ఎమ్మే పట్టాదారుడు, నెల్లూరుకు థెరిసా రాక, నెల్లూరు లో తొలి బ్యాంకు, తొలి ట్రావెలర్స్ బంగళా వంటి విషయాలతోపాటు దాదాపు వందేళ్ళ క్రితం నాటి వ్యవసాయం, తూకాలు-కొలతలు, ధరలు, నీటిపారుదల, డ్రైనేజీ వ్యవస్థ; అలాగే, నెల్లూరు లోని – మూలపేట, సంతపేట, ఆర్.ఆర్.వీథి వంటి స్థలాల కథలు, నెల్లురుకు ప్రముఖ సాహితీపుత్రుల రాక, నెల్లూరీయులే అయిన ఎందరో గొప్ప సాహితీవేత్తల పరిచయం (ఈ వ్యాసాలు పుస్తకం.నెట్ లో ప్రచురిస్తూ ఉన్నాము. అవి ఇక్కడ చూడవచ్చు), నెల్లూరులోని పాత స్కూళ్ళ కథ, బ్రిటీషు కాలంనాటి ఆహ్వాన పత్రాలు, రాయలకాలం తెలుగు శాసనాలు – ఇలా ఒక విషయమని కాక, నెల్లూరు గురించిన సమస్త విషయాల గురించీ రాసారు.

నెల్లూరుతో నాకు ఉన్న అనుబంధం అది మా అమ్మమ్మ, తాతల తరానికి సొంతూరు కావడమే. ఎప్పుడో చిన్నప్పుడు మూణ్ణాలుగు సార్లు వెళ్ళిన జ్ఞాపకమంతే. కానీ, నాకు సహజంగానే ఏదన్నా పాత ఊరి గురించిన కథలను తెలుసుకోడంపై ఉన్న ఆసక్తి వల్ల ఈపుస్తకం బాగా నచ్చింది. నెల్లూరీయులు మరింత బాగా ఆస్వాదించగలరనుకుంటాను. మనం ఓ ఊర్లో కొన్నాళ్ళుంటే, పుట్టింది మొదలు అదే ఊర్లో ఉంటున్న పక్కింటాయన అడపాదడపా గోడ మీదుగా మనకి ఆ ఊరి కథలు, అక్కడి మనుష్యుల కథలూ చెప్తూ ఉంటే ఎలా ఉంటుందో, ఈ పుస్తకమూ అలాగే ఉంటుంది.

పుస్తకంలో ప్రధాన లోపాలు:
-ఒక విషయ సూచిక లేకపోవడం. కొన్ని పుస్తకాలకి ఎందుకు విషయసూచికలుంచరో మరి, అసలర్థం కాదు!!
-తరుచుగా అసంపూర్ణ/అస్పష్ట వాక్యాలు తారసపడ్డం.
-ఒంగోలు వెంకటరంగయ్య గారికి అంకితమిస్తూ రాసిన వ్యాసం మినహాయిస్తే దాదాపు వ్యాసాలన్నీ అసమగ్రంగా ఉండటం. ఆ వ్యాసంలా మిగితా వ్యాసాలు రాసి ఉంటే, ఈ భావన కలిగేది కాదేమో.
-ఒక్కటంటే ఒక్క రిఫరెన్సైనా ఇవ్వకపోవడం. ’చరిత్ర’ అని క్యాప్షన్ పెట్టాక కనీసం ఆమాత్రమన్నా ఇవ్వకుంటే, ఒకవేళ ఎవరి గురించన్నా వివరంగా తెలుసుకోవాలనిపిస్తేనో? కనుక, రిసర్చీయులకి పుస్తకం పనికిరాదు కానీ, మామూలుగా చదివి క్యూరియాసిటీ పెంచుకోడానికి పనికొస్తుంది.

పుస్తకం వివరాలు:
పెన్నాతీరం
రచయిత: ఈతకోట సుబ్బారావు
తొలి ముద్రణ: సెప్టెంబర్ 2008
కాపీలు: ఈతకోట సుబ్బారావు, H.No. 24-1175, 2nd Street, Ravindra nagar, Nellore – 524004.
మొబైల్: 9440529785
వెల: వంద రూపాయలు
పేజీలు: 200

You Might Also Like

3 Comments

  1. రామ

    ప్రత్యూష గారు. తెలుగు లో వ్రాయడానికి lekhini.org గాని , http://www.google.com/transliterate/indic/telugu గాని ప్రయత్నించండి.

  2. prathyusha reddy

    hi..thanku so much ..i am searching for that book from so many days.basically i am nelloreian and i like u r writings so much,and i want to write this in telugu but i dont know how to…i tried quillpad but its full of mistakes .can u please help me……please……

Leave a Reply to రామ Cancel